Ministri i Drejtësisë, Krenar Lloga sot ka zhvilluar një takim me kryetaren e Këshillit Gjyqësor, Vesna Dameva, ku kanë biseduar për zhvillimet aktuale në të dyja institucionet.
Nga Ministria e Drejtësisë thonë se vendimi i Gjykatës Administrative me të cilin Dameva u rikthye në krye të Këshillit ngjall shpresë për kthimin e besimit tek institucionet, si dhe domosdoshmërinë e punës ligjore dhe të përgjegjshme.
Ministri Lloga përshëndeti vendimin e shumicës së anëtarëve të Këshillit Gjyqësor për ndërprerjen e procedurës për përcaktimin e përgjegjësisë së kryetares së Gjykatës së Lartë, Besa Ademi.
Në takim, u diskutua edhe rreth Strategjisë për Zhvillimin e Sistemit të Drejtësisë (2024-2028) dhe masat e parashikuara nga ajo për reformat në zgjedhjen, përgjegjësinë dhe shkarkimin e presidentit dhe anëtarëve të Këshillit Gjyqësor. Strategjia është në përputhje të plotë me rekomandimet e Misionit vlerësues, për të cilat kryetarja e këshillit, Dameva, shprehu gatishmërinë për t’i zbatuar.
Ministri Lloga informoi se gjatë javës së ardhshme Grupi Punues do të përgatisë draft versionin e ndryshimeve ligjore për Këshillin Gjyqësor.
Këshillit Gjyqësor iu kërkua të shqyrtojë të gjitha rastet dhe korrespondencën e Ministrisë së Drejtësisë që i janë dërguar, në një kohë sa më të shkurtër.
Nga Ministria e Drejtësisë shtojnë se bashkëpunimi institucional i Ministrisë së Drejtësisë dhe Këshillit Gjyqësor do të intensifikohet në periudhën e ardhshme përmes bashkëpunimeve dhe projekteve të ndërsjella për të rikthyer besimin e qytetarëve në sistemin e drejtësisë.