Sot shënohet 20 vjetori i vdekjes së ish presidentit të Maqedonisë së Veriut Boris Trajkovskit i cili humbi jetën në një fatkeqësi ajrore në Rotimlje afër Mostarit të Bosnje dhe Hercegovinës, transmeton Portalb.mk.
Në fatkeqësinë e 26 shkurtit të vitit 2004, së bashku me Trajkovskin jetën e humbën edhe tetë persona tjerë nga delegacioni i RMV-së të cilët udhëtonin për në një konferencë ndërkombëtare.
Në aksidentin ajror humbën jetën edhe këshilltarët e kabinetit të tij Dimka Ilkova-Boshkoviq, Risto Blazhevski dhe Anita Lozanovska, punonjësi i MPJ-së së Maqedonisë, Mile Kërstevski, anëtarët e sigurimit Boris Velinov dhe Ace Velinovski si dhe pilotët Marko Markovski dhe Branko Ivanovski.
Për këtë tragjedi pati dy hetime të ndryshme në lidhje me shkaqet, nëse tragjedia ishte fatkeqësi apo akt terrorist. Raportet theksojnë gabimet e pilotit si dhe mangësi tjera të sistemit.
Raporti i parë si shkak kryesor thekson gabimet procedurale gjatë aterrimit.
Ndërsa raporti i dytë thekson mangësi sistematike.
Kjo ditë zakonisht shënohet me vendosjen e luleve në vendin e fatkeqësisë në përkujtim të jetëve të humbura.