Procedura për shpalljen publike të Qeverisë për blerjen e 45 automjeteve lizing është efikase dhe e ligjshme, tha zëvendëskryeministrja për qeverisje të mirë Sllavica Gërkovska, duke përsëritur konkluzionin e Komisionit Kundër Korrupsionit se procedura është e ligjshme, si dhe mendimin e ekspertëve të ekonomisë të cilët konsiderojnë se “është mënyra më e mirë dhe më efikase.”
“Nga KSHPK-ja e mëparshme ka pasur reagime, por pasi kemi marrë të gjithë rastin, konkluzioni i KSHPK-së në atë kohë ishte se e gjithë procedura ishte në përputhje me ligjin dhe kjo thjesht nuk na vë në pozitë për të filluar procedura të mëtejshme”, tha Gërkovska.
Në lidhje me iniciativën e KSHPK-së deri tek Qeveria që të ngrejë përgjegjësi ndaj drejtorit të Fondit për Inovacione për shkak të dhënies së fondeve Drin Ahmetit, Gërkovska tha se nuk e ka marrë dhe nuk e ka parë përshkrimin.